depar

Depar, acut. Est une preposition composée de De (qui signifie mouvance de lieu, et en ceste diction Depar, motif de mandement et d'autorité) et de ceste diction Par, raccourcie de la letre T, (qui signifie partie, ce que les mal escrivans et malparlans en Latin, disent Pro parte, et Ex parte) et signifie, pouvoir et authorité de quelque chose faire au lieu de celuy qui depute et commet. Ainsi le Roy commettant un chevalier de l'ordre pour le bailler à un nouveau esleu, commence sa lettre de commission par ces mots, Depar le Roy chef et souverain de l'ordre, et au dispositif, parle ainsi: Vous commettons, ordonnons et deputons pour depar nous presenter et bailler à tel le collier dudit ordre, et de luy prendre le serment avec les conditions et ceremonies accoustumées.

Ailleurs Depar signifie purement de la part ou par mandement de, dont on use ordinairement és cris publiques, de par le Roy c'est à dire de la part ou par authorité et mandement du Roy. Les Secretaires des commandemens des regnes passez jusques à puis n'agueres en usoient aussi en teste des lettres closes du Roy escrites à ses subjects, commençans le narré desdites lettres par Nostre amy et feal ou autres epithetes, selon la qualité du personnage où elles estoient addressantes. Ce qui estoit bien plus royal et de plus de majesté que la façon qui ausdits Secretaires est ordinaire pour le jourd'huy, laissans ladite clause De par le Roy, et faisans parler le Roy à son subject en ces mots, monsieur tel etc. Esdites lettres closes ceste clause Depar le Roy signifioit de la part du Roy, et non par mandement d'iceluy comme ésdits crys publiques. Depar, se prent aussi pour, de, Au 12. livre d'Amad. vous avez grand tort d'ainsi vous plaindre de mon pere: car s'il a receu quelque bien depar vous ç'a esté par ma faveur et par le commandement que je vous en ay fait, non pour amour de luy, car moy seule vous ay fait venir et sejourner en sa compagnie: c'est à dire s'il a receu quelque bien de vous.

Thresor de la langue françoyse. Jean Nicot.